صفوت ناصف

الإثنين، 27 نوفمبر 2023 - 08:26 م

فرن عيش و لوح عجين 

و مطرحة

و فرحة الدار بكوزين درة

زر البطاطا

ما بيتحرقش في فرننا

كات جدتي

صاحبة القاعة القديمة

بتحب كل الخير لكل الخلق

بقوشة مليانة بخيرات الإله في الدار

و حصيرة الجبنة القريش 

عمرانة بالخير الكتير

طعم الفطير مالهشي حل

متحلي بالسمنة الحلال

و ابن الحلال في الغيط بيحرت أرضنا

في الغيط بيحفظ عرضنا

بيتنا الكبير كان عرضنا

كات لمة الدار الفقيرة

تشبه الفرحة في صلاة العيد

لبس الجديد قبل الصلاة

و اللف ع الأحباب

و الدنيا كانت كلها زحاليق

كان المطر بيهز بيت أجدع فقير

عمرانة دور المساكين بالطيبة و الصحبة

صوت جدي كان بيزلزل الشنبات

و جدتي حاكمة كل الدار

و لا كانشي يجرؤ حد يتكلم

الكلمة كلمة ست الدار

بتوزع المنابات 

و الكل راضي بقسمته

الأخ ياكل و اللي يشبع أخوه

ربوه حلال ، فاتعلم الرضا

راضي بنصيبه مهما كان في القسمة

دارنا الفقير

كان يشبه النسمة

بيتنا اللي كان فيه لمبتين من جاز

مش أي حد يمتلك بوابير

بابورين في صوتهم متعة لأهل الدار

مستيين طعم العشا بالليل

أنا ستي كانت تشبه البهوات

شنة و رنة و كلمة تتنفذ

كات ست هانم رغم قصر الإيد

و لا يوم بتكسف حد مد الإيد

ستي اللي كان يوم لقاها العيد

ما بتنحنيش غير لرب الكون

و لا يهدى حالها إلا أمام جدي

جدي اللي كان الكل بيحبه

جيبه الكبير مليان كتير بالفرح

جدي ده يشبه صرح

ربانا على حب الوطن 

على احترام الغير

و العمة أم

و العم أب

و الكل واحد مهما فتنا الدار

جدي الكبير اندفن

و خد معاه ستي

جدي و ستي خدوا معاهم الخير

نشفت جاموسة دارنا و اتعضمت

و فرن بيتنا انهار

و كل واحد من العيال 

ضل الطريق بعده

يا جدي ليه ما حلفتناش ع العهد

نفضل نحب بعضنا و نود

نساوين الدار بقوا أيقونات للشر

بيهدوا بين كل الرجال يا كبير

يا ستي فرنك بعدك خلاص اتهد

مكسور حياتي أصبحت نصين

نص في ماضي كله حب و ود

و نصه حاضر كلهم كارهين

ماعدش حد يعرف حد

كل البيوت صارت بيوت للغير

يا جدي لسه بأتذكرك في صلاتي

إنت و ستي مهما تمر سنين